Бэҕэһээ Ытык Күөл киэн туттуута буолбут лицей саҥа кырасыабай уораҕайыгар үөрэҕирии сайдыытын уонна квалификацияларын үрдэтэр институт кыттыылаах улуус оскуола иннинээҕи саастаах оҕолору үөрэтэр иитээччилэргэ аналлаах курстар саҕаланнылар.
Улуус ыҥырыытынан педагогическай наука кандидата, институт директорын солбуйааччы, СӨ үөрэҕириитин туйгуна Михалева Ольга Иннокентьевна «ФОП ДО: практические аспекты реализации» диэн темаҕа курсу ааҕан саҕалаата. Манна иитээччилэр уонна оҕо уһуйаанын салайааччылара көхтөөх кыттыыны ылаллар.
Улуустааҕы үөрэх управлениетын начальнига Дягилев Иннокентий Иннокентьевич курсу аһарыгар эҕэрдэ тылыгар уһуйаан иитээччилэрэ үөрэҕириигэ сүрүн олугу уурааччылар буолалларын бэлиэтээн туран, курс истээччилэригэр туһалаах, көдьүүстээх үлэни баҕарда. Ольга Иннокентьевна оскуола иннинээҕи саастаах оҕолору иитии, үөрэтии хаамыытыгар саҥа федеральнай үөрэх программатын иһинэн бырайыактааһын төрдүн сиһилии, өйдөнүллэр гына интэриэһинэйдик кэпсээтэ.
Курс кыттыылаахтара ФОП ирдэбилинэн көрсүллэр кыһалҕаны анализтааһыҥҥа, сөптөөхтүк сыаналааһыҥҥа практическай дьарыкка көхтөөх кыттыыны ыллылар. Бастакы күн ылбыт билиилэрэ төрөппүттэри кытта ыкса ситимнээх үлэни олохтуурга уонна Ольга Иннокентьевна информацияны системалааһыҥҥа, чопчулааһыҥҥа сүбэлэрэ күннээҕи үлэлэригэр олус туһалаах буолуоҕун эттилэр. Кыттааччылар бэйэлэрин долгутар ыйытыыларыгар хоруйдары ылан астыннылар. Биһиги педагогтарбыт үөрэх үлэтигэр билиилэрин үрдэтэн инники өссө ситиһиилээхтик үлэлиэхтэрэ диэн эрэнэбит.
Источник: https://таатта.рф/liczejga-iiteechchilerge-anallaah-kurstar-sa5alannylar/