Суруйааччы Н.Д. Неустроев аата үйэлэргэ умнуллубат
Таатта улууһун Н.Д.Неустроев аатынан Уус Таатта орто оскуолатыгар биир дойдулаахпыт, саха уус-уран литературатын төрүттэспит кылаассык суруйааччы, комедиограф, прозаик Николай Денисович Неустроев төрөөбүтэ 130 сылыгар аналлаах өрөспүүбүлүкэтээҕи «XI Неустроев ааҕыылара» научнай-практическай кэмпириэнсийэ ахсынньы 2 күнүгэр кэтэхтэн ыытылынна. Кини олоҕун, айар үлэтин кэлэр көлүөнэ ыччакка үйэтитэр сыаллаах научнай-практическай кэмпириэнсийэни С.Н.Донской – II аатынан Үөрэҕи сайыннарар учууталлар идэлэрин үрдэтэр үнүстүүтүн тыл кафедратын, М.К.Аммосов аатынан ХИБУ Хотугулуу-Илиҥҥи олохтоох норуоттарын тылларын уонна култуураларын үнүстүүтүн “Саха литературата” хаапыдыратын, Таатта улууһун Үөрэҕириитин салалтатын кытта бииргэ өрөпүүбүлүкэ үгүс үөрэнээччилэрин, учууталларын хабар тэрээһини былааннаан ыыттыбыт. Ол курдук Таатта, Чурапчы, Амма, Мэҥэ-Хаҥалас, Горнай, Бүлүү, Сунтаар, Ньурба, Өлүөхүмэ, Томпо, Верхоянскай, Орто Халыма, Усуйаана, Өймөкөөн, Эбэн-Бытантай улуустарын, Дьокууускай куорат №-17, Айыы Кыһата оскуолаларын, Өрөспүүбүлүкэ лиссиэй-интернатын үөрэнээччилэрэ уонна учууталлара көхтөөхтүк кытыннылар.
