Оскуола иннинээҕи саастаах оҕону сахалыы санардан иитии үлэ опытын билиһиннэрии

Оҕону кыра эрдэҕиттэн төрөөбүт тылынан саҥардар сүдү суолталааҕын өйдөөн С. Н. Донской-2 аатынан Үөрэҕи сайыннарар уонна идэни үрдэтэр институттан директоры солбуйааччы Ольга Иннокентьевна Михалева, Оскуола иннинээҕи үөрэхтээһин кафедратын старшай преподователя Мария Николаевна Слепцова уонна Дьокуускай куорат «Остров сокровищ»оҕо саадыттан Колмогорова Татьяна Вячеславовна бу сыл ыам ыйын 31 күнүгэр Хатастааҕы «Кэрэчээнэ» оҕо уһуйааныгар сылдьан оҕону сахалыы саҥардан сайыннарар «Айыы ыллыга» бырагыраамаларынан үлэлэрин билсибиттэрэ. Хатастар оҕону олоҥхоҕо уһуйар, төрөөбүт тылынан саҥардан барҕа алгыстарынан, хоһоон тылынан, дьыл эргииринэн төрүт үгэстэргэ олоҕурбут​ үлэлэрин көрдөрбүттэрэ. Атын омук тыла баһыйа быһыытыйбыт кэмигэр оҕо төрөөбүт тылынан саҥарар, ыллыыр-туойар, олоҥхолуур баҕатын көбүтэр, төрүт култуураҕа уһуйар ньымаларын кэпсээбиттэрэ. Уһуйаан үлэһиттэрэ оҕолору кытары «Дьырыбына Дьырылыатта» олоҥхону толорон, сахалыы тыас-уус үнүстүрүмүөннэригэр оонньоон үөрдэ сөхтөрбүттэрэ, иитээччилэр араас хайысхалаах үлэлэрин билиһиннэрбиттэрэ. Хатастар кырдьыга даҕаны бүгүҥҥү күҥҥэ олус суолталаах, таһаарыылаах үлэлэрин уопутун тарҕаталларыгар диэн бу ый 23 күнүгэр С. Н. Донской-2 аатынан Үөрэҕи сайыннарар уонна идэни үрдэтэр институт ыҥырыытынан Дьркуускайга улуустартан мустубут биир идэлээхтэригэр курсаннарга киирэн үлэлэрин билиһиннэрдилэр.Уһуйаан сэбиэдиссэйэ Г.С. Николаева «Олоҥхо-олохпут ситимэ» диэн нэһилиэк тэрилтэлэрэ бүтүннүү тутуһан үлэлиир бырагыраамаларын, сэбиэдиссэйи солбуйааччы С.А.Ноговицына «Айыы ыллыга» диэн оҕону сахалыы саҥардан, олоҥхо педагогикатынан иитэн, төрүт култуураны, үгэһи тутуһуннаран сайыннарар бэйэлэрэ үлэлээн олорор «Айыы ыллыга» бырагыраамаларын билиһиннэрбитин кэннэ иитээччилэр, эбии үөрэхтээһин педагогтара айымньылаах үлэлэрин билиһиннэрдилэр. Бэйэлэрэ оҥорбут олоҥхо куукулаларын, муусука үнүстүрүмүөннэрин илэ көрдөрөн, алгыс толотторон, бэл саҥа тезнологияны туһанан оҕо төрөөбүт тылынан саҥарар баҕатын көбүтэн, тылын сайыннарыахха сөбүн кэпсээн   истээччилэр интэриэстэрин тартылар, олонхо сценарийдарын, күннээҕи үлэҕэ туттуллуон сөптөөх матырыйаалларын тарҕаттылар. Араас улуустартан мустубут 49 истээччи астынан, мазтанан тарҕастылар.