Эдэр учууталлар күрэхтэрэ

Кулун тутар 21-22 күннэригэр Мэҥэ Хаҥалас улууһун А.С.Шахурдин аатынан Төҥүлү орто оскуолатыгар илин эҥээр улуустар эдэр учууталларын регионнааҕы «Эдэр учуутал» куонкуруһа ыытылла турар. 7 араас улуустан барыта 20 кыттааччы кэлбит. Бары бастакы тургутууну, улуустааҕы күрэҕи, ситиһиилээхтик ааспыт эдэр дьон. Кинилэр кимнээҕий?

Мэҥэ Хаҥалас улууһуттан Александрова Ольга Андреевна, алын кылаас учуутала (С.З.Борисов аатынан Тыыллыма ОО), Дьячкова Нарыйа Алексеевна, история уонна обществознание учуутала (Аллараа Бэстээх 2№ ОО), Ильина Эльмира Афанасьевна, омук тылын учуутала (Хорообут ОО), Решетникова Зинаида Валерьевна, информатика учуутала (Майа лицейэ), Тастыгин Алексей Иннокентьевич, физкультура учуутала (И.Г.Игнатьев аатынан Харатааҕы оҕо спортивнай ОО). Амма улууһуттан Дьячковская Анна Васильевна, нуучча тылын уонна литературатын учуутала (А.Е.Кралин аатынан Абаҕа ОО), Карпова Сахая Даниловна, биология учуутала (Чакыр ОО), Седалищева Сардана Ивановна, нуучча тылын уонна литературатын учуутала (Е.Л.Чистяков аатынан Маай орто оскуолата). Таатта улууһуттан Платонова Алина Степановна, математика учуутала (И.Н.Гуляев аатынан Туора-Күөл ОО), Пономарёва Надежда Николаевна, физика учуутала (П.А.Ойуунускай аатынан Чөркөөх ОО), Томпо улууһуттан Булдакова Нюргуяна Федоровна, саха тылын уонна литературатын учуутала (Е.Н.Протопопов аатынан Саһыл ОО). Чурапчы улууһуттан Атаков Дьулустан Сергеевич, физика учуутала (С.А.Новгородов аатынан Чурапчы ОО), Макарова Юлия Мироновна, омук тылын учуутала (С.К.Макаров аатынан Чурапчы гимназията), Новгородова Ньургуйаана Михайловна, математика учуутала (Д.П.Коркин аатынан спортивнай ОО), Попов Айсен Анатольевич, история уонна обществознание учуутала (Н.Д.Субуруускай аатынан Болтоҥо ОО). Уус Алдан улууһуттан Афанасьева Виктория Николаевна, математика учуутала (Г.В.Егоров аатынан Мүрү 1№ ОО), Борисов Сергей Владимирович, история учуутала (Өспөх ОО), Егорова Любовь Эдуардовна, биология учуутала (Бэйдиҥэ ОО), Олесова Оксана Николаевна, омук тылын учуутала (Суотту ОО). Уус Маайа улууһуттан Глазков Харысхан Николаевич, омук тылын учуутала (Уус Маайа сүрүн оскуолата).

2 күн устата билиини тургутар, сатабылы көрдөрөр, таһымы арыйар күөн күрэс 2 сүрүн түһүмэҕинэн ыытылынна. Бастакы күн «Профи учуутал» түһүмэххэ уруок, методическай семинар куонкурустара буолла. Иккис күн «Маастар учуутал» түһүмэх – маастар кылаас, хамаанданан үөрэтиини бырайыактааһын, педсовет.