Саха Өрөспүүбүлүкэтин Үөрэҕи сайыннарар уонна идэни үрдэтэр С.Н. Донской-II аатынан институт уонна Сунтаар улууһун үөрэҕин салаата кыттыһан өрөспүүбүлүкэтээҕи научнай-методическай семинары балаҕан ыйын 16-18 күннэригэр ыыттылар. Семинар темата: «ФГОС усулуобуйатыгар инновационнай педагогическай уопут уонна уруокка ирдэбиллэр».
Бу тэрээһиҥҥэ барыта 158 учуутал сырытта, ол иһигэр ыаллыы Ньурба улууһуттан 23 учуутал кыттыыны ылла. Семинарга сылдьыбыт Ньурба улууһун Н.Н. Чусовской аатынан Антоновка орто оскуолатыттан сылдьыбыт учууталлар бэлиэтииллэринэн, «…семинар сүрдээх дириҥ ис хоһоонноох, учууталларга көмөтө улахан, төһө да ФГОС туһунан өйдөөбүппүт иһин, өссө биһигиттэн үрдүк таһымнаах ҮөСуоИҮИ методикатынан мунаахсыйар өрүттэрбитин чуолкайдаатылар, өйдөттүлэр. Семинарга этиллибит теоретическай өрүттэрин Элгээйи учууталларынан ыытыллыбыт уруоктарга көрөн астынныбыт уонна ФГОС чахчы оҕону толкуйдата үөрэтэрин итэҕэйдибит. Урукку традиционнай ньымалартан атын уратылаах, үрдүк таһымнаах үөрэтии барарын харахпытынан көрөн итэҕэйдибит.
ФГОС ирдэбилигэр патриотическай иитии күүскэ турар, онно сөп түбэһиннэрэн, Саха Өрөспүүбүлүкэтин учууталларыттан бастакынан Россия рекордарын кинигэтигэр киирбит билиҥҥи кэм дьиҥнээх дьоруойа, Күндэйэ оскуолатын физкультураҕа учуутала А.М. Кузьминныын көрсүһүү сэминээр кыттыылаахтарыгар киэн туттуу кыымын сахта. Биһиэхэ, сахаларга маннык хорсун дьоннор, дойдуларын аатын түһэн биэрбэт патриоттар баалларыттан үөрэбит.
Семинар иккис түһүмэҕэр ҮөСуоИҮИ кафедратын сэбиэдиссэйэ Л.Н. Прокопьева РФ үөрэҕириитин билиҥҥи саҥа сокуонугар сөп түбэһиннэрэн, инклюзивнай, уратылаах оҕолору үөрэтии туохха олоҕурарын туһунан сиһилии өйдөттө. Семинар культурнай чааһыгар улуус учууталларын күүһүнэн улахан концерт буолла, манна улуус үөрэҕин Управлениетын начальнига Г.М. Еремеевтан саҕалаан, элбэх учууталлар ыллаан-туойан үөртүлэр. В. Гюго «Оскуола ыллыыр-үҥкүүлүүр буоллаҕына, оскуола буолар», — диэн этиитэ Сунтаар улууһун учууталларын, оҕолорун ырыаларыгар-тойуктарыгар арылхайдык көстөр.
Үөрэх управлениетын начальнига Г.М. Еремеев семинар туһунан маннык бэлиэтээтэ: «Бу семинар салгыыта аны кыһын буолуон сөп. ҮөСуоИҮИ кытта былаанныыбыт, кэпсэтии ыытабыт. ФГОС-ка үлэлии сылдьар учууталлар уопуттарын атастаһыы, инклюзивнай үөрэх коррекционнай педагогикатын ырытыһыы буолбута кэрэхсэбиллээх».
Семинар салайааччыта, К.В. Павлов, п.н.к., Сунтаар улууһун улуу киһитин С.А. Зверев-Кыыл уолун «Кэлэр көлүөнэлэргэ кэс тыл» поэматынан түмүктээтэ: Кэлэр үйэм көлүөнэлэрэ,
Кэс тылым түмүгүн истиҥ:
Күн уотунан күүстэнэн,
Этиҥ уотунан эрчимнэнэн,
Куйаар уотунан куһуурданан,
Үөрэх бөҕөтүн үмүөрүтэн,
Билии бөҕөтүн тэнитэн,
Уйгу быйаҥы тэнитиҥ!
Общественноһы кытта сибээс отдела
]]>