Илин эҥэр улуустар эдэр учууталлара күрэхтэстилэр

Кулун тутар 18-19 күннэригэр  «Илин эҥэр бастыҥ эдэр учуутала-2024» куонкурус Чурапчы улууһун Д.Д. Красильников аатынан Мугудай орто оскуолатыгар ыытылынна. Куонкуруска  алта улуустан 26 сайаапка киирбититтэн  бастакы кэтэхтэн турга эссе уонна учуутал тус интернет сайтын көрүү түмүгүнэн 17 эдэр учуутал талыллан кыттыыны ылла. 

Бастакы күн биэс хайысханан “Үөрэнээччини кытта сэһэргэһии” түһүмэх  уонна уруоктары көрүү  буолла. Конкурсаннары 13 эксперт сыаналаата. Дьүүллүүр сүбэҕэ С.Н. Донской–II аатынан Үөрэҕи сайыннарар уонна идэ таһымын үрдэтэр үнүстүүт  исписэлиистэрэ, улуустартан үөрэх салалтатын методическай отделын салайааччылара, оскуола учууталлара, Республикатааҕы «Сыл бастыҥ учуутал -2023» күрэх кыайыылааҕа П.Н. Гоголев, Дьокуускай куорат «Сыл бастыҥ учуутала-2024»   күрэх кыайыылааҕа С.А. Курчатова, «Илин эҥэр бастыҥ эдэр учуутала» былырыыҥҥы кыайыылааҕа Т.А. Попова үлэлээтилэр.

Иккис күн маастар кылааска учууталлар бэйэлэрин үлэлэригэр хото туттар, уратылаах, аныгылыы, билиҥҥи кэм үөрэнээччитигэр сөп түбэһэр, бастыҥтан бастыҥ ньымаларын билиһиннэрдилэр. Бииртэн биир ураты, интэриэһинэй,  оҕо билиини ыларыгар болҕомтону хайдах тардан үөрэтэр уратыларын үллэһиннилэр. Кыттааччылар бары киэҥ өйдөөх-санаалаах, оҕоҕо истиҥ, чугас сыһыаннаах, барытыгар көхтөөх, наһаа аһаҕас уонна олус сырдык ыралаах ыччаттар эбит. Чахчы даҕаны, маннык аныгылыы көрүүлээх, киэҥ билиилээх, бэйэлэрин санааларын, толкуйдарын сайа этэр, киһиэхэ тириэрдэр учууталлар баар буоллахтарына инникибит кэскилэ киэҥ эбит диэн санааҕа кэлэҕин.

Үс түһүмэх кэнниттэн сэттэ бастыҥ учуутал финалга таҕыстылар:

  • Аргунова Юлия Захаровна, Мэҥэ Хаҥалас улууһун И.М.Романов аатынан Төхтүр орто оскуолатын алын кылаас учуутала;
  • Миронов Артур Евгеньевич, Таатта улууһун А.Е. Мординов аатынан Таатта лицейын историяҕа уонна обществознанияҕа учуутала;
  • Санников Юрий Андрианович, Чурапчы улууһун Д.Д.Красильников аатынан Мугудай орто оскуолатын историяҕа уонна обществознанияҕа учуутала;
  • Тарабукин Иннокентий Константинович, Уус Алдан улууһун В.В.Алексеев аатынан Мүрү уоланнар гимназияларын технологияҕа учуутала;
  • Дьячковская Любовь Михайловна, Чурапчы улууһун С.К.Макаров аатынан Чурапчы гимназиятын математикаҕа учуутала;
  • Никифоров Алексей Афанасьевич, Уус Алдан улууһун М.Н.Готовцев аатынан Танда орто оскуолатын биологияҕа учуутала;
  • Никифоров Егор Трофимович, Амма улууһа, Н.Е.Иванов аатынан агро хайысхалаах Бөтүҥ орто оскуолатын историяҕа уонна обществознанияҕа учуутала.

Финалистарга «Тылы учууталга» түһүмэҕи, үөрэхтээһин эйгэтин сытыы боппуруостарын тула кэпсэтиини  Чурапчы улууһун үөрэҕин салалтатын методическай отделын сүрүн исписэлииһэ, педагогическай наука кандидата Артемьев Н.П. сатабыллаахтык ыытта. Эдэр учууталлар бэйэлэрин көрүүлэрин анаардылар, сүбэ-ама ыллылар, саҥа санаалар, сонун идеялар этилиннилэр.

Икки күннээх эрийсиилээх куонкурус түмүгүнэн хайысхаларынан кыайыылаахтар быһаарылыннылар. Ол курдук:

  • “Шаг в профессию”   Үөрэҕи сайыннарар уонна идэ таһымын үрдэтэр үнүстүүт  анал аатын кыайыылааҕа –Никифоров Алексей Афанасьевич, биология учуутала, Уус Алдан;
  • “За историческое просвещение” анал аат кыайыылааҕа- Санников Юрий Андрианович, история уонна обществознание учуутала, Чурапчы;
  • “Учитель, обеспечивающий успех ученика” анал аат кыайыылааҕа – Миронов Артур Евгеньевич, история уонна обществознание учуутала, Таатта;
  • “За вклад в формирование практических навыков учащихся” –Тарабукин Иннокентий Константинович, технология учуутала, Уус Алдан.

Дьаһал биир бэлиэ түгэнинэн алта улуус үөрэҕин салалтатын начальниктарын ааттарыттан 6 эдэр учууталга Республика тас өттүгэр стажировкаҕа сертификат туттарыллыбыта буолла.

Куонкурус муҥутуур кыайыылааҕын үрдүк аатын Никифоров Егор Трофимович, Амма улууһун Н.Е.Иванов аатынан агро хайысхалаах Бөтүҥ орто оскуолатын историяҕа уонна обществознаниеҕа учуутала сүктэ. Киниэхэ үөрэх үлэһиттэрин рескомун аатыттан харчынан бириис ананна. Ону тэҥэ Чурапчы улууһун баһылыга С.А.Саргыдаев эдэр учууталлары өйөөн туруорбут ноутбук бирииһин улуус баһылыгын социальнай боппуруостарга солбуйааччы М.Ф. Кронникова туттарда.

Лилия Афанасьевна ПЕРМЯКОВА,

Чурапчы улууһун үөрэҕин управлениетын

информационнай технологияларга салаатын сүрүн специалиһа

Прокрутить вверх