«Куолу-2022» өрөспүүбүлүкэтээҕи араатардар күрэстэрэ түмүктэннэ
С.Н.Донской-II аатынан Үөрэҕи сайыннарар уонна идэни үрдэтэр үнүстүүт, Таатта улууһун үөрэҕин салалтата, Э.К.Пекарскай аатынан Игидэй орто оскуолата бу дьыл кулун тутар ыйын 2 күнүгэр педагогическай үлэ бэтэрээнэ, Арассыыйа Бэдэрээссийэтин үөрэҕириитин бочуоттаах үлэһитэ, “Арассыыйа бастыҥ учууталлара” Гранын стипендиата, Саха Өрөспүүбүлүкэтин үөрэҕириитин туйгуна, история, обществознание учуутала Варламова Анна Павловна төрүттээбит «Куолу-2022» өрөспүүбүлүкэтээҕи араатардар күрэхтэрин 26-с төгүлүн тэрийэн ыытта.
Быйылгы күрэскэ барыта 210 тыл этээччи: Амма, Горнай, Мэҥэ-Хаҥалас, Сунтар, Уус-Алдан Томпо, Муома, Орто-Халыма, Нам, Таатта , Чурапчы, Үөһэ-Бүлүү, Кэбээйи, Нам улуустарыттан, Дьокуускай куораттан кыттыыны ыллылар.
Үгэскэ кубулуйбут тэрээһиҥҥэ дьиэ кэргэн, уһуйаан, алын сүһүөх уолаттара, орто, улахан сүһүөх оскуола оҕолоро, улахан дьон – нэһилиэк барыта кытынна. Онтон оскуола оҕолоро үс тылынан, сахалыы, нууччалыы, омуктуу тылынан санааларын сайа эттилэр, саҥарар дьоҕурдарын, сатабылларын дьүүллүүр сүбэҕэ көрдөрдүлэр.
Дьүүллүүр сүбэ быһаарыытынан 15 бастыҥ тыл этээччи куйаар ситиминэн өрөспүүбүлүкэ муҥутуур кыайыылааҕы талар быһаарыылаах түһүмэххэ күөн көрүстүлэр. 5 түһүмэхтээх эрийсиилээх күрэс кэнниттэн «Бастыҥ Куолуһут» үрдүк аатын иккис төгүлүн Чурапчы улууһун Болот Боотур аатынан Хатылы орто оскуолатын 10 кылааһын үөрэнээччитэ Николаев Кэнчээри эрэллээхтик сүктэ.
I Үрдэл — Лопатина Ариана, Игидэй орто оскуолатын 7 кылааһын үөрэнээччитэ.
II Үрдэл — Капитонов Максим, Дьокуускай куорат 38 нүөмэрдээх оскуолата.
III Yрдэл — Варламова Аня, Игидэй орто оскуолатын 9 кылааһын үөрэнээччитэ
III Үрдэл — Анисимова Күннэй- М.А.Алексеев аатынан интернат лицей 6б кылааһын үөрэнээччитэ.
Тэрийэр бөлөх
