Төрөөбүт тыл уонна Сурук-бичик күнүн көрсөр тэрээһиннэр чэрчилэринэн олунньу 1 күнүттэн саҕалаан олунньу 13 күнүгэр диэри сылын аайы ыытыллар «Ийэ тыл илгэтинэн-2021»диэн Өрөспүүбүлүкэтээҕи ыалынан уус-уран ааҕыы күрэҕэ 356 дьиэ кэргэни хабан, өрө күүрүүлээхтик, тыҥааһыннаахтык буолан ааста. Күрэҕи С.Н. Донской II аатынан Үөрэҕи сайыннарар уонна идэни үрдэтэр институт, Өймөкөөн улууһун үөрэҕириитин салаата, Н.М.Заболоцкай аатынан Томтор оскуолата, оскуола алын кылааһын учууталларын методическай холбоһуга уонна бырайыак ааптара, алын кылаас үрдүк категориялаах учуутала, СӨ үөрэҕириитин Туйгуна, СӨ үөрэхтээһин систиэмэтин бочуоттаах бэтэрээнэ Егорова Люция Ивановна тэрийэн ыыттылар. Бу күрэххэ дьиэ-кэргэн дьонун барыларын аахтахха 1200-чэкэ киһи, 359 ыалтан 308 видео ыытан, Саха сирин 22 улууһуттан төрөөбүт төрүт тылбытын — саха тылын өрө тутан көхтөөхтүк кыттыннылар. Быйыл ордук аҕалар, эһэлэр кыттыылара элбээбитэ үөрдэр.
Хас биирдии дьиэ кэргэн ис дууһаларынан кыһанан, сахалыы таҥнан, анал сахалыы тыыннах сиргэ тиийэн, тылларын үөрэтэн долгуйан иэйэн – куойан туран. саха биллэр суруйааччыларын хоһооннорун дорҕоонноохтук аахпыттара, хас биирдии оҕоҕо төрөөбүт тылыгар убаастабылы, киэн туттууну, тапталы сахпыта саарбахтаммат.
Күрэҕи дьүүллүүр сүбэ элбэх мөккүөрүнэн, кыттааччы элбэҕинэн, кылаас аайы «Чыпчаал кыайыылааҕы» таларга быһаарыы ылынан маннык түмүгү таһаарда.
1 кылаас оҕолоругар (79 кыттааччы) «Чыпчаал кыайыылаах» — Муома улууһун Орто-Дойду В.Д.Лебедев аатынан орто оскуола 1 кылааһын үөрэнээччитэ Богдашина Амина аҕатыныын Богдашин Федор Анатольевичтыын буоллулар. Салайааччы — Черова Аида Егоровна.
2 кылаас оҕолоругар (86 кыттааччы) «Чыпчаал кыайыылаах» — Ньурба улууһун Акана П.С.Егоров аатынан орто оскуола 2 кылааһын үөрэнээччитэ Семенова Сахаайа ийэтиниин Сардана Андреевналыын, аҕатыныын Ефрем Михайловичтыын буоллулар. Салайааччы Сергеева Альбина Николаевна.
3 кылаас оҕолоругар (67 кыттааччы) «Чыпчаал кыайыылаах» – Дьокуускай куорат 17 нүөмэрдээх орто оскуола 3 кылааһын үөрэнээччитэ Спиридонов Прокопий ийэтиниин Надежда Прокопьевналыын буоллулар. Салайааччы: Попова Ольга Прокопьевна.
4 кылаас оҕолоругар (76 кыттааччы) «Чыпчаал кыайыылаах» – Мэҥэ-Хаҥалас С.З.Борисов аатынан Тыыллыма орто оскуола 4 кылааһын үөрэнээччитэ Осипов Леонид ийэтиниин Аксинья Алексеевналыын Салайааччы: Чичахова Елена Васильевна.
Саха омук сүппэтин туһугар, саха ыала сахалыы кэпсэтиэхтээх, саха ыала сахалыы ааҕыахтаах, сахалыы эйгэни олохтуохтаах, саха оҕото сахалыы саҥарыахтаах! Бу санаанан салайтаран, санаабытын түмэн, бары бииргэ ылыстахпытына, саха ыала өҥ тыыннаныа, саргы талаан тардыыланыа, сайаҕас сэмэй тылланыа, сырдык сайдыы аартыктаныа!
Бары күрэҕи өйөөбүт кыттааччыларбытыгар, салайааччыларга, тэрийээччилэргэ барҕа махталбытын тиэрдэбит! Аны да саха тылын өрө тутан, тылбыт сайдарын туһугар утумнаах үлэни күүһүрдүөххэ!
Тэрийэр бөлөх
