Олоҥхону үөрэтиигэ сонун хайысха

Олоҥхо декадатын чэрчитинэн бу  дьыл  сэтинньи ыйын 24-н  ахсынньы ый 02 күнүгэ дылы Үөрэҕи  сайыннарар уонна идэни үрдэтэр институт көҕүлээһининэн  уһуйааччылар уонна оҕолор  кыттыгастаах,  ону таһынан  учууталлар  – барыта 20 улахан киһи уонна 40 оҕо   кууруска  үөрэннилэр. Бу көннөрү куурус буолбакка ураты, сонун хайысханы тутуспут куурус быһыытынан көрүөххэ сөп. Ол курдук тоҕус күн устата  олоҥхону толорооччулар-уһуйааччылар,олоҥхоһуттар, үөрэтээччилэр бэйэ-бэйэлэригэр үөрэтэр-билэр ньымаларын таһынан   анаан-минээн олоҥхону толорорго үөрэнээри, билээри уонна  республика араас муннугуттан кэлбит үөрэнээччилэри эмиэ уһуйдулар.   Кууруска Ньурба, Таатта, Сунтаар, Уус-Алдан, Мэҥэ-Хаҥалас, Чурапча, Кэбээйи, Амма улуустарыттан кэлэн уопут атастаһан, уһуйааччылар  маастар кылаас фестивалыгар куурус кыттааччыларыгар анаан сүрдээх дириҥ ис хоһоонноох, наһаа туһалаах  сүбэлэри-амалары биэрдилэр. Туойуу арааһын, олоҥхону үөрэтиигэ туохха болҕомто ууруохха сөбүн, оҕону интэриэһиргэтэр ураты ньымаларын кытта үллэһиннилэр. Ону таһынан кууруска институт үлэһиттэрэ аныгы үөрэх ирдэбилин сүрүн уратыларын туһунан  араас тиэмэлээх лекциялары аахтылар. Сунтаар улууһун олоҥхону уһуйааччыта-үөрэтээччитэ,  маастар-педагога Никандр Прокопьевич Тимофеев  ураты ньыматын, Амма улууһун Бөтүн орто оскуолатыттан «Оллоон» куруһуок салайааччыта, маастар-педагог Анисия Даниловна  Софронова  ирдэбиллээх дириҥ ис хоһоонноох  кэпсээннэрин  кытта  тэҥҥэ алтыһыннаран  билиҥҥи үөрэх ситимигэр  ФГОС өйдөбүллэрин, ирдэбилин, олоҥхо бу чинчийэргэ киэҥ байҕал буоларын туһунан  институт үлэһиттэрэ үгүһү кэпсээтилэр.

Куурус түмүгэр уһуйааччылартан  үөрэнээччилэр тоҕус күн устата туохха үөрэммиттэрин көрдөрдүлэр: эдэр кэскиллээх уһуйааччыта Чурапчы улууһун Хайахсытыттан  Каженкин Игнатий Борисович уһуйбут уолаттара 14 уол кэчигирэһэн  олоонноон олорон олоҥхолоотулар.  Олоҥхоһут кыргыттар Хордогосова Рая, Соловьева Клара, чабырҕахсыттар Саша уонна Лариса Жариналар, Новикова Надя талба талааннарын, чуор куоластарын, имигэс тылларын бигэргэтэн  норуот уус-уран айымньыларыттан быһа тардан  иһитиннэрдилэр. Уһуйааччылар оҕолорго  үөрэппит, тиэрдибит билиилэрин көрөн-истэн  куурус истээччилэрэр, уһуйааччылар сүрдээҕин астыннылар. Салгыы маннык практическай уонна теоретическай хайысхалаах куурус өссө төгүл ыытылла турарыгар учууталлар, уһуйааччылар баҕа санааларын эттилэр.

Саха оҕото этигэр-хааныгар иитиэхтии сылдьар сүдү күүһүн уһугуннаран, онно тирэҕирэн, оҕону сайыннарыы, сайдыылаах омуктары кытта тэҥҥэ турар өйү-санааны биэрии, этигэр-хааныгар иҥэрии, аныгы олох  сайдыытын бары өрүттэрин ылынар, сөптөөх усулуобуйаны тэрийэн атын таһымҥа таһаарар  ытык иэстээхпит.

Өбүгэбит уус-уран тыл күүһүнэн кэнчээри ыччаппытын сиэрдээх киһи буоларыгар  үөрэтэр  хайысхалаах холобурдарыгар болҕомтобутун ууран, бастыҥ майгылаах-сигилилээх  үүнэр көлүөнэни   иитэргэ учуутал(иитээчи), уһуйааччы кыһаллан бары билиибитин-кыахпытын ууруоҕуҥ.

 

Төрүт  тыллар   кафедралара

]]>

Оставьте комментарий

Ваш адрес email не будет опубликован. Обязательные поля помечены *